أنت تستحق الحب
بقلم دكتورة: ولاء السايح _مصر
طبعًا انت فاهم وعارف يعني ايه أنك تحب شخص آخر، فالشعور بالتقدير الشديد لشخص آخر والرغبة بالتواجد معه دائمًا هو شئ مألوف معناه لك وفاهمه كويس. وبتعمل الكثير والكثير في سبيل تقويه حبك للشخص الآخر وفي سبيل ان الشخص الاخر ده يبادلك نفس الشعور، وبتكون مستعد تعمل اي حاجة ممكنه. وساعات الغير ممكنه كمان
لكن تفتكر انك بتعمل كل المجهود ده مع حبك وتقديرك لنفسك؟
هتقولي ايه حبي وتقديري لنفسي ده كمان
هقولك اه ما انت علشان تعرف تحب غيرك لازم تحب نفسك الاول
وحب الذات عبارة عن تركيبه كدة من قبول النفس، وإدراكها، وامتلاك احترام ومودّة للنفس.
وحب الذات هو من خلال المعادلة دي (مفهوم + عمل) في نفس الوقت = حب الذات.
هتقولي ازاي
هقولك هو انك تفكر في نفسك على أنها تستحق الاحترام واللطف، وهو تعامل نفسك بتعاطف وود.
يعني ببساطة كدة تقدير الذات هو احترامك لنفسك بشكل إيجابي وبطريقة عملية.
يعني تفهم حبك لنفسك وتمارسه كمان
وطبعًا حب الذات يختلف عن الانانية تمامًا
فحب النفس: هو منح نفسك الحب والاهتمام والتقدير والرعاية اللازمة، وتقبل نفسك بعيوبك ومميزاتك. ببساطة هو البحث عن الاستقرار النفسي.
وهو بداية الطريق لحب جميع من حولك ومنحهم أيضًا الاهتمام اللازم. فهو لن يجعلك تؤذي غيرك، ولكنه وسيلة لتحسين علاقتك بذاتك
لان زي ما قولنا علشان تعرف تحب غيرك لازم تحب نفسك الأول.
أما الأنانية بقي هي أن ترى نفسك واحتياجاتك ورغباتك فقط (وحط تحت كلمه فقط كذا خط) دون أن تدرك أن الآخرين موجودون أيضًا من حولك لتلبية احتياجاتهم ورغباتهم. ببساطة كدة ، الأنانية هي البحث عن المصلحة الفردية حتى وإن كانت على حساب الآخرين.
كدة انا احنا فهمنا الجزء الاول من معادلة حب الذات الا وهو (المفهوم) وهو ايه حب الذات.
تعالي بقي نتكلم عن الجزء التاني من المعادلة الا وهو (الفعل)
وهو ازاي احب ذاتي
هقولك ان هعملك اربع خطوات تمارسهم علشان تحب ذاتك
ولكل خطوة من دول هيكون جواهم خطوات داخلية علشان نوصل للهدف الاساسي وهو انك تحب فسك. و ده هيكون موضوع المقال القادم
ولحد ما مقال ازاي تحب نفسك ينزل عاوزاك
تذكر نفسك أنك تستحق الحب .. آمن بنفسك دائمًا وكن الشخص المتفائل الواثق بنفسه.
أنت تستحق الحب
